काठमाडौ । नेपाल आर्मी १८ स्वर्ण, १२ रजत र ५ कांस्यसहित कुल ५ पदक जित्दै आइतबार ४४औं राष्ट्रिय एथलेटिक्स प्रतियोगितामा टिम च्याम्पियन बनेको छ ।
त्रिपुरेश्वरस्थित दशरथ रंगशालामा सम्पन्न प्रतियोगितामा अर्को विभागीय टिम एपीएफ ९ स्वर्ण, ६ रजत ८ कांस्यसहित कुल २३ पदक हात पार्दै दोस्रोमा रह्यो । वाग्मती प्रदेश ३ स्वर्ण, २ रजत र ६ कांस्यसहित कुल ११ पदक प्राप्त गर्दै तेस्रो भयो । पुलिसले ३ रजत र ४ कांस्य हात पार्यो । सात प्रदेश र तीन विभागीय टिमले ३२ स्वर्णका लागि प्रतिस्पर्धा गरेका थिए । विभागीय टिमबाहिरका खेलाडीले स्वर्ण जित्न सकेनन् ।
प्रतियोगितामा पुरुषतर्फ एपीएफका शिवराज पार्की र महिलातर्फ आर्मीकी जयरानी थारूले उत्कृष्ट खेलाडीको पुरस्कार हात पारे । शिवराजले ३ स्वर्ण र १ रजत जिते भने जयरानीले २ राष्ट्रिय कीर्तिमानीसहित ४ स्वर्ण र १ रजत जितिन् । प्रतियोगितामा तीन राष्ट्रिय कीर्तिमान बने र त्यसमा जयरानीले १ सय र ४ सय मिटर हर्डल्समा राष्ट्रिय कीर्तिमान बनाइन् ।
अर्को कीर्तिमान आर्मीका जीवन थारूले पुरुष १ सय १० मिटर हर्डल्समा बनाएका थिए । जीवनले २ स्वर्ण र २ रजत पदक हात पारे । नेपाल एथलेटिक्स संघद्वारा आयोजित प्रतियोगितामा प्रत्येक राष्ट्रिय कीर्तिमानका लागि ५ हजार पुरस्कार दिइयो ।
दशरथ रंगशालामा सम्पन्न तीनदिने प्रतियोगितामा दस टिमका २ सय ४० खेलाडीले प्रतिस्पर्धा गरेका थिए ।
