रूपन्देही, असार २१ । प्युठानको ऐरावती गाउँपालिका वडा नं ६ बिजुलीकोटमा चट्याङ लागेर दुईजना बालकको मृत्यु भएको छ । सोही घटनामा अन्य ९ जना घाइते भएका छन् ।
मृत्यु हुनेमा स्थानीय ७ वर्षीय रोमन परियार र १२ वर्षीय किरण परियार रहेको जिल्ला प्रहरी कार्यालय प्युठानका प्रमुख प्रहरी नायव उपरीक्षक सत्यनारायण थापाले जानकारी दिए । गएराति परेको चट्याङ लागेर घाइते भएका दुवैजनाको जिल्ला अस्पताल बिजुवारमा उपचारको क्रममा मृत्यु भएको उनले बताए ।
यस्तै चट्याङबाट ऐरावती – ६ का ५ जना र ऐरावती – १ दाङबाङका ४ जना गरी ९ जना घाइते भएका छन् । तीमध्ये दाङबाङकी ७० वर्षीया पोवी नेपालीको अवस्था गम्भीर रहेको थापाले बताए । घाइते सबैको जिल्ला अस्पताल बिजुवामा उपचार भइरहेको प्रहरीले जनाएको छ ।
