काठमाडौं, असार २३ । साझा यातायातले काठमाडौ उपत्यकामा आज (बिहीबार) देखि ३ नयाँ विद्युतीय बस सञ्चालनमा ल्याएको छ । चीनबाट पहिलो चरणमा आएका यी ३ बस परीक्षण पश्चात् आजदेखि संचालनमा आएका हुन् ।
बसको ‘सफ्ट लञ्च’ साझा यातायातका संस्थापक अध्यक्ष ८५ वर्षीय विश्वबन्धु थापाले गरेका हुन् । यी विद्युतीय बसमा महिला चालक र सहचालक छन् । चीनको नानजिंगस्थित सीएचटीसीएचओ कम्पनीको विद्युतीय बसको कारखानामा तयार भएका यी बसको ग्रेडबिलिटी टेस्ट पनि सम्पन्न भइसकेको छ । यस्तै बाँकी ३७ वटा बस पनि २०७९ साउन मसान्तसम्म भित्रिने योजना रहेको बताएका छन् ।
साझाले प्रति बस डेढ करोड रुपैयाँ लागतमा ४० वटा बसको लागि करिब ६१ करोड खर्चिँदै छ । यो बस ९ मिटर लामो छ । यसपछि १२ मिटर लामो र अन्तरप्रदेश चल्ने विद्युतीय बस ल्याउने तयारी पनि भइरहेको साझाले जनाएको छ । आजदेखि सञ्चालनमा आएका यी बस सेमी फ्लो अर्थात बालबालिका एवं वृद्धवृद्धा र अपाङ्गहरु चढ्न मिल्ने र्याम्पको सुविधाका साथै वाइफाइ, टिभी डिस्प्ले, सीसी क्यामेरा पनि जडित छन् ।
दुई बस नयाँ बसपार्क, बालाजु, ठमेल, रत्नपार्क-सिंहदरबार बानेश्वर- मिनभवन हुँदै एयरपोर्ट रूटमा सञ्चालन हुनेछन् भने एउटा बस लगनखेल-लैनचौर-बाँसबारी हुँदै बुढानिलकण्ठ रूटमा सञ्चालनमा आउने छ ।
