बाजुरा, असार २४ । बाजुराको बुढीगंगा नगरपालिकामा हिजो भएको मतदानको गणना सुरू भएको छ । बिहान सर्वदलीय बैठकपश्चात वडा नम्बर ५ मा रहेको भानोदय नमुना माविमा गणना थालिएको हो ।
झण्डै १३ हजार मतदाता रहेको बुढीगंगामा ९ हजार १२८ मत खसेको छ । जुन कुल मतदाताको ६६.८३ प्रतिशत मात्र हो । मतगणना वडा नम्बर १ र १० बाट सुरू गरिएको छ । बुढीगंगा नगरपालिकाको प्रमुखमा नेकपा एमालेको तर्फबाट रामबहादुर बानिया र गठबन्धनको तर्फबाट रंग खाती चुनावी मैदानमा छन् । यस्तै उपप्रमुखमा एमालेबाट मनाकुमारी खड्का र गठबन्धनबाट रिता शाही उम्मेदवार बनेका छन् ।
गत वैशाख ३० गते भएको निर्वाचनमा मतदानका क्रममा सुरक्षा व्यवस्था फितलो भएकाले निष्पक्ष र स्वतन्त्र मतदान हुन नसकेपछि निर्वाचन आयोगले बुढीगंगा नगरपालिकामा पुनः मतदानको निर्णय गरेको थियो ।
