सुर्खेत । कर्णालीका जंगलमा फिरन्ते जीवन बिताउँदै आएका राउटे समुदायका युवतीलाई यौन दुर्व्यवहारर गर्नेलाई कैद र जरिवाना तोकिएको छ।
लोपोन्मुख राउटे समुदायका दुई युवतीलाई यौन दुर्व्यवहारर गर्नेलाई सुर्खेत जिल्ला अदालतले कैद र जरिवाना तोकेको हो । अदालतका न्यायाधीश डा. राजेन्द्रकुमार आचार्यको इजलासले राउटे युवतीलाई यौन दुर्व्यवहारर गर्ने चौमन घर्तीमगर र भूपेन्द्र बुढामगरलाई सात÷सात वर्ष कैद र जनही दुई लाख रुपैयाँ जरिवाना तोकेको हो।
बिहीबार भएको फैसलाअनुसार उनीहरूले पीडित राहत कोषमा जनही ८ हजार रुपैयाँ जम्मा गर्नुपर्नेछ । यौन दुर्व्यवहारर भएको होटलका सञ्चालक मनबहादुर पुनलाई ३ वर्ष ६ महिना कैद र एक लाख रुपैयाँ जरिवाना तोकिएको अदालतका सूचना अधिकारी उज्ज्वल रावलले जानकारी दिए। उनले चार हजार रुपैयाँ पीडित राहत कोषमा जम्मा गर्नुपर्ने फैसलामा उल्लेख छ। जेल सजाय र जरिवाना तोकिएका तीनै जनालाई २०७८ असार १६ गते पुर्पक्षका लागि जेल चलान गरिएको थियो।
सुर्खेतको गुर्भाकोट नगरपालिकाको आपसोती जनैघाटस्थित भेरी नदी किनारमा बसोबास गर्दैै आएका बेला राउटे समुदायका दुई युवती यौन दुर्व्यवहाररको सिकार भएका थिए । मनबहादुरले सञ्चालन गरेको बोटेचौरको शुभकामना होटलमा जेठ २१ गते राति राउटे युवतीमाथि यौन हिंसा भएको थियो।
राउटे युवतीलाई मदिरा खुवाएर यौन हिंसा गरेको भिडियो सार्वजनिक भएपछि २०७८ जेठ २३ गते प्रहरीले उनीहरूलाई प्रक्राउ गरेको थियो।
