उदयपुर । भारतकै घटनाको झझल्को दिने गरि उदयपुरमा एक शिक्षकले मरणासन्न हुने गरि बिद्यार्थीलाई कुटपिट गरेका छन् । उदयपुरगढी गाउँपालिका – ५ स्थित आधारभुत बिद्यालय केउरिनीमा कक्षा १ मा अध्ययनरत ६ बर्षिय बालक प्रमोद रोकालाई प्रधानाध्यापक जिवन श्रेष्ठले निर्घात कुटपिट गरेका हुन् ।
बिहिबार बिद्यालयले आयोजना गरेको बक्तृत्वकला कार्यक्रममा पछाडी बसेर हल्ला गरेको भन्दै प्रधानाध्यापक श्रेष्ठले बालकलाई बाँसको भाटाले शरीर भरी निलडाम हुने गरि कुटपिट गरेको पिडितका बुवा राजु रोकाले बताउनुभयो । केहि समय अघि यस्तै प्रकृतिको घटना भारतको पटना स्थित एक कोचिङ सेन्टरमा मरणासन्न हुने गरि बिद्यार्थीलाई कुटपिट गरेको भिडियो सामाजिक संजालमा भाईरल भएको थियो ।
बिहिबार उदयपुरमा भएको सोही प्रकृतिको घटनाले अहिले सामाजिक संजाल तातिएको छ । सामाजिक संजालमा अधिकारकर्मीहरुले नाबालक बिद्यार्थीलाई निर्घात कुटपिट प्रति आपत्ति जनाउँदै दोषीलाई कडा कारबाही हुनुपर्ने माग गरेका छन् । आफ्नो नाबालक छोरालाई सामान्य बिषयमा मरणासन्न हुनेगरि कुटपिट गरिएकोमा बुवा राजु रोकाले निज दोषी शिक्षकलाई कडा कारबाही गर्नुपर्ने माग गरेका छन् ।
यता बिद्यालयका प्रधानाध्यापक श्रेष्ठले बालकलाई आफुले पिटेको तर सामाजिक संजालमा सार्बजनिक भएको जस्तो निलडाम हुने नपिटेको बताएका छन् । उनले भने, ‘सामाजिक संजालमा सार्बजनिक भएजस्तो ढाडमा निलडाम छैन, त्यो नियतवश ईडिट गरेर हालिएको हो । यता पिडितका बुवा राजु रोकाले भने नाबलकलाई मरणासन्न हुनेगरि कुटपिट गरेपछि छोरा बिरामी अवस्थामा रहेको बताएका छनु । उनले न्यायका लागी सरोकारवाला सबैलाई सहयोग गर्न र दोषी शिक्षकलाई कारबाहीको लागी अनुरोध गरेका छन् ।
