चितवन, असार ३२ । प्रेस चौतारी नेपाल चितवनका उपाध्यक्ष एवं नारायणी अनलाइनका सम्पादक कृष्ण आचार्यमाथि भरतपुर विद्युत् कार्यालयमा हातपात र दुर्व्यहार भएको भन्दै नेपाल पत्रकार महासंघ चितवन शाखा र प्रेस चौतारी नेपाल जिल्ला शाखा चितवनले दोषीलाई कारबाही गर्न माग गरेको छ ।
भरतपुरमा रहेको विद्युत् कार्यालयभित्र मदिरासहितको भोज भएको भन्ने सूचनाका आधारमा शुक्रबार साँझ समाचार संकलनका लागि गएका आचार्यमाथि मदिराले मातिएका कर्मचारीहरुले हातपात गर्दै उनको साथमा रहेको दुईवटा मोबाइलसमेत खोसेका थिए । कार्यालयको मुख्य गेट बन्द गरेर हातपात गरेको र लगाएको कपडासमेत च्यातिदिएको आचार्यको भनाइ छ ।
महासंघ चितवन शाखाका सचिव दिपेन्द्र अधिकारीले शनिबार एक विज्ञप्ति जारी गर्दै समाचार संकलनका लागि गएका पत्रकार आचार्यमाथि भएको दुर्व्यवहारमा संलग्न सबै कर्मचारीलाई नियन्त्रणमा लिएर कानुनी कारबाहीको दायरामा ल्याउन माग गरेको छ ।
यसैगरी, सो घटनाको प्रेस चौतारी नेपाल जिल्ला शाखा चितवनका अध्यक्ष सुवास पण्डितले नेपाल विद्युत् प्राधिकरण भरतपुर वितरण केन्द्रका प्रमुख राजीवकुमार सिंहलाई विभागीय कारबाहीको लागि जोडदार माग गरेका छन् ।
