काठमाडौं । तीन दिने भारत भ्रमणमा रहेका नेकपा माओवादी केन्द्रका अध्यक्ष पुष्पकमल दाहाल प्रचण्डलाई आइतबार सत्तारुढ भारतीय जनता पार्टी (भाजपा)ले मुख्यालयमा स्वागत गर्ने भएको छ । शुक्रबार नयाँदिल्ली पुगेका प्रचण्डले शनिबार विदेशमन्त्री एस जयशंकर, सुरक्षा सल्लाहकार अजित डोभाललगायत उच्च स्तरीय भेटघाट गरेका छन्।
आज आइतबार प्रचण्डलाई दिनदयाल उपाध्याय मार्गस्थित मुख्यालयमा स्वागत गरिने भाजपाले जनाएको छ। भाजपा केन्द्रीय कार्यालयले शनिबार जारी गरेको विज्ञप्तिमा आइतबार विहान ११:३० बजे प्रचण्डलाई अध्यक्ष जेपी नड्डाले स्वागत गर्ने उल्लेख छ।
त्यसपछि भाजपा मुख्यालयमा प्रचण्ड र नड्डाबीच दुई पार्टीबीच अन्तर सम्बन्ध विस्तारका विविध पक्षमा छलफल हुने विज्ञप्तिमा जनाइएको छ । त्यसक्रममा अध्यक्ष नड्डाले ‘नो बीजेपी’ अर्थात भाजपालाई जान्नुस् अभियानबारे ब्रिफिङ गर्नेछन् । प्रचण्डलाई भाजपा मुख्यालयको अवलोकनसमेत गराउने छन्।
प्रचण्डको स्वागतमा विदेशमन्त्री जयशंकर र विदेश विभाग प्रमुख विजय चौथाइवाले पनि भाजपा मुख्यालयमा उपस्थित हुने भाजपाले जनाएको छ।
