काठमाडौं, साउन १ । सत्तारुढ दल नेपाली कांग्रेस र नेकपा माओवादी केन्द्रनिकट विद्यार्थी संगठन नेविसंघ र अखिल (क्रान्तिकारी) ले राष्ट्र बैंकका गभर्नर महाप्रसाद अधिकारी विरुद्ध काठमाडौँको बालुवाटारमा प्रदर्शन गरिएको छ ।
अधिकारीको राजीनामा माग्दै नेविसंघ र अखिल क्रान्तिकारीले राष्ट्र बैंकमा घेराउ गर्दै संयुक्त विरोध प्रदर्शन गरेका हुन् । आइतबार बिहान बालुवाटारमा ३ नम्बर गेटसँगै रहेको नेपाल राष्ट्र बैंकको गेटमा गभर्नर अधिकारीलाई कार्यालय प्रवेशमा रोक लगाउने भन्दै उनीहरुले प्रदर्शन गरेका छन् ।
प्रदर्शनमा प्रहरीले हस्तक्षेप गरेको छ । प्रदर्शनमा उत्रिएका केहि प्रदर्शनकारीलाई प्रहरीले पक्राउसमेत गरेको छ । गभर्नर अधिकारी नेकपा एमालेको अर्थ तथा योजना विभागका सदस्य भएको समाचार सार्वजनिक भएसँगै अधिकारीको नियुक्ति बारे बहस र आलोचना सुरु भएको हो ।
अधिकारीको नियुक्ति ‘राजनीतिक संलग्नता नभएको स्वतन्त्र व्यक्ति मात्र गभर्नर हुनसक्ने प्रावधान’ विपरीत भएको खुल्न आएको भएको भन्दै युवा विद्यार्थी सङ्गठनहरूले विरोध चर्काएका हुन् । गभर्नर अधिकारीले भने उक्त व्यक्ति आफू नभएको प्रष्टीकरण दिएका छन् ।
शनिबार वाईसीएल नेतृत्वको टोलीले गभर्नरलाई बर्खास्त गरी छानबिन अघि बढाउन प्रधानमन्त्रीलाई भेटेरै ज्ञापन पत्र बुझाएको छ ।
