विराटनगर, साउन ६ । प्रहरीले भारत लैजान लागिएको ८ ट्रक सुपारी नियन्त्रणमा लिएको छ । बिहीबार राति विराटनगर महानगरपालिका–१८ बुधनगर हुँदै भारततर्फ लैजान लागिएको साढे आठ करोड रूपैयाँभन्दा बढीको ८ ट्रक सुपारी प्रहरीले नियन्त्रणमा लिएको हो ।
प्रहरीले नियन्त्रणमा लिएको सुपारी २ हजार ६७८ बोरा छ । ८ वटा ट्रकमा २ लाख १९ हजार ५९६ किलोग्राम सुपारी रहेको प्रहरीले जनाएको छ । उक्त सुपारीको मूल्य नेपाली आठ करोड ६३ लाख ८१ हजार पाँच सय ६८ रूपैयाँ बराबरको छ । जसको भारतीय मूल्य पाँच करोड ३९ लाख ८८ हजार चार सय ८० रुपैयाँ हुन्छ ।
प्रहरीले सुपारी लोड गरिएको युपी ४५ टी १६२४, एमपी ०९ एचजी ८३२०, एमपी २२ एच १०३१, युपी ५० बिटी ७२७७, युपी ६२ बिटी ८१२१, युपी ५४ टी ६४२९, युपी ५० एटी ३१५८ र युपी ६२ सिटी ०६२७ नम्बरको भारतीय ट्रक नियन्त्रणमा लिइएको हो ।
जिल्ला प्रहरी कार्यालय मोरङका अनुसार ठूलो परिणामको सुपारी भारत जाँदै गरेको सूचना पाएलगत्तै प्रहरीले नियन्त्रणमा लिएको हो ।
