कैलाली, साउन ७ । सशस्त्र प्रहरी बलले धनगढीको सेती प्रादेशिक अस्पताल नजिकबाट स्रोत नखुलेको १७ लाख ६६ हजार ६७० भारतीय रुपैयाँसहित दुई जनालाई पक्राउ गरेको छ ।
पक्राउ पर्नेमा धनगढी उपमहानगरपालिका – १ शान्तिनगरका १७ वर्षीय विवेक चन्द र १८ वर्षीय सरोज धामी रहेको सशस्त्र प्रहरी बल नेपाल ३४ नं गणका सूचना अधिकारी एवं प्रहरी नायब उपरीक्षक देवराज जोशीले जानकारी दिए । सशस्त्र प्रहरी बलको इन्टिलीजेन्स ब्युरोको सूचनाको आधारमा उनीहरूलाई पक्राउ गर्न सफल भएको उनले बताए ।
प्रहरी नायब उपरीक्षक जोशीका अनुसार उनीहरुलाई स्रोत नखुलेको सो रुपैयाँसहित आज बिहान साढे ५ बजे साइकलमा धनगढीको चौराहतिर जाँदै गरेको अवस्थामा अस्पताल नजिकबाट पक्राउ गरिएको हो । उक्त रकमबारे दुवै जनाले प्रहरीलाई यथार्थ कुरा नभनिरहेको उनले बताए ।
रकमसहित दुवै जनालाई राजश्व अनुसन्धान कार्यालय कोहलपुरमा बुझाउने तयारी भइरहेको जोशीको भनाइ छ ।
