झापा, साउन ८ । झापामा तीनजना किशोरीले एउटै रुखमा झुन्डिएर सामूहिक आत्महत्या गरेका छन् । जिल्लाको कचनकवल गाउँपालिका- ५ स्थित सुनकोसी चिया बगानमा रहेको बयरको रुखमा झुन्डिएर स्थानीय तीन किशोरीले सामूहिक आत्महत्या गरेको प्रहरी कार्यालय झापाका डीएसपी वसन्त पाठकले जानकारी दिए ।
सामूहिक आत्महत्या गर्नेहरूमा कचनकवल- ५ निवासी पंचम गणेशकी १६ वर्षीया छोरी करिना, पुवालु गणेशकी १७ वर्षीया छोरी अञ्जली र बिरबल गणेशकी १६ वर्षीया छोरी कल्पना रहेका छन् । दुईजना एउटै हाँगामा र अर्की अर्को हाँगामा झुन्डिएको अवस्थामा फेला परेको डीएसपी पाठकले बताए ।
स्थानीयका अनुसार उनीहरू तीनैजना शनिबार दिउँसोदेखि बेपत्ता रहेका थिए । उनीहरू आइतबार बिहान साढे ७ बजे सामूहिक रुपमा झुन्डिएको अवस्थामा स्थानीयले फेला पारेपछि प्रहरीलाई खबर गरेका थिए । तीनैजना किशोरी सोही चिया बगानमा काम गर्ने गर्दथे ।
सामूहिक आत्महत्याको कारण भने नखुलेको डीएसपी पाठकले जानकारी दिए । अहिले घटनास्थलमा प्रहरी खटाइएको छ ।
