काठमाडौं, साउन ९ । नेपाली कांग्रेस निकट पत्रकारहरुको संगठन नेपाल प्रेस युनियनको नवौं महाधिवेशनबाट अध्यक्षमा शिव लम्साल निर्वाचित भएका छन् । लम्सालले ७४५ मत ल्याएर निर्वाचित भएका हुन् । उनका निकटतम प्रतिद्वन्द्वी अनिता विन्दुले भने ६१२ मत ल्याएकी थिइन् । लम्साल संस्थापनइतर र अनिता सभापति शेरबहादुर देउवा पक्षकी हुन् ।
यस्तै वरिष्ठ उपाध्यक्षमा प्रेम केसी ६८५ मतसहित निर्वाचित भएका छन् । उनका निकटम प्रतिद्वन्दी सरोज अधिकारी ६६५ मत ल्याएर पराजित भएका हुन् । अधिकारी पनि संस्थापन पक्षका हुन् । उपाध्यक्ष खुलातर्फ २ पदका लागि नकुल अर्याल ७७५ मत र भीष्मराज ओझा ६४० मतसहित निर्वाचित भए । नकुल संस्थापन इतरका हुन् । ओझा भने संस्थापन पक्षका हुन् । उपाध्यक्षतर्फका उम्मेदवारहरू राममणि दाहाल र शेखर रेग्मी भने पराजित भए ।
यस्तै उपाध्यक्ष महिलातर्फ सलोजा दाहाल ७२० मतसहित निर्वाचित भइन् । उनका प्रतिद्वन्दी कल्पना शर्मा ६१९ मत ल्याएर पराजित भइन् । सलोजा संस्थापनइतरकी हुन् । उपाध्यक्ष समावेशीतर्फ दीपेन्द्र वान्तवा निर्विरोध निर्वाचित भएका थिए । उपाध्यक्ष प्रदेश नम्बर १ तर्फ डिल्लीराम खतिवडा ५६० मतसहित र मधेश प्रदेशतर्फ अनिल कर्ण ६४८ मतसहित निर्वाचित भए ।
बागमती प्रदेश उपाध्यक्षमा मुरारी अधिकारी, गण्डकी प्रदेश उपाध्यक्षमा ऋषिकान्त पौडेल, लुम्बिनी प्रदेश उपाध्यक्षमा माधवप्रसाद अर्याल, कर्णाली उपाध्यक्षमा राजेन्द्रबहादुर कार्की र सुदूरपश्चिमको उपाध्यक्षमा प्रेम चुनारा निर्वाचित भएका छन् । अधिकारी ६७१ मत, पौडेल ६७३ मत, अर्याल ७०१ मत, कार्की ६६९ मत र चुनारा ५५२ मतसहित निर्वाचित भएका हुन् । उपाध्यक्ष उपत्यकातर्फ जीवन भण्डारी ८४२ मतसहित निर्वाचित भएका छन् ।
महासचिवमा दिलिप पौडेल ८७८ मतसहित निर्वाचित हुँदा जगन्नाथ दुलालले ४५१ मतमात्रै ल्याए । दिलिप संस्थापनइतरका हुन् । उनी गगन थापानिकट मानिन्छन् । दुलाल भने प्रकाशमान सिंह र विश्वप्रकाश शर्मानिकट मानिन्छन् । उपमहासचिव खुलातर्फ ३ पदमा कमल पन्तको ५७७ मत, युवराज गौतमको ७३७ मत र रवीन्द्र सुवेदीको ५५८ मतसहित निर्वाचित भएका छन् ।
यस्तै उपमहासचिव महिला २ पदमा दिलिपाश्री अधिकारी ६८१ मत र सुलोचना गौतम ६९० मतसहित निर्वाचित भएका छन् । दिलिपाश्री संस्थापननिकट हुन् । उपमहासचिव समावेशीतर्फ अभयकुमार राई ७१३ मतसहित निर्वाचित भएका छन् । सचिव खुला चार पदका लागि केदारप्रसाद दाहाल ६७७ मत, खगेन्द्र भण्डारी ६४८ मत, तीर्थराज बस्नेत ५८० मत र भुवन शर्मा ६३७ मतकासाथ निर्वाचित भएका छन् ।
सचिव महिला ३ पदमा पुष्पा शर्मा ६४४, मेनुका ढुंगाना ८०१ र रेजिना गौतम ६३९ मतसहित निर्वाचित भए । सचिव आदिवासी जनजातितर्फ लालकुमार मोक्तान ७४१ मतसहित निर्वाचित भए । सचिव मधेशीतर्फ अजित तिवारी, सचिव दलिततर्फ राजन रूचाल, सचिव पिछडिएको क्षेत्रतर्फ एलपी देवकोटा, सचिव थारूतर्फ सहदेव चौधरी, सचिव खसआर्यतर्फ युवराज रेग्मी निर्वाचित भए ।
साथै सचिव अनलाइन माध्यमतर्फ छायाचन्द्र भण्डारी, सचिव रेडियो माध्यमतर्फ नरहरि सापकोटा, सचिव टेलिभिजनतर्फ अशोककुमार तिवारी, सचिव छापा माध्यमतर्फ राधा खनाल निर्वाचित भएका छन् । कोषाध्यक्षमा माधव धितालले निकटम प्रतिद्वन्दी रमेश वाग्लेलाई पराजित गर्दै ६७४ मतसहित निर्वाचित भए । वाग्ले संस्थापनइतरका उम्मेदवार हुन् भने धिताल संस्थापन पक्षका हुन् ।
