चितवन । जिल्ला प्रशासन कार्यालय चितवनमा सेवाग्राहीको भीड उस्तै छ । कार्यालय परिसरका पसल र मुख्य गेटअगाडिका पसलमा पनि त्यस्तै भीड छ । भीडमा भेटिन्छन् अधिकांश युवायुवती । भर्खरै प्लस टु पास गरेका युवायुवतीहरुको हातहातमा नागरिकता, शैक्षिक योग्यताका प्रमाणपत्रहरु छन् । सेवा अनलाइन भने पनि झ्यालबाट सेवा लिनेदिने शैली उस्तै छ । पसल अगाडिको भीडमा देखिनेहरु दुई उद्देश्यले झुम्मिएका छन्, पहिलो राष्ट्रिय परिचयपत्र बनाउन फाराम भर्ने र दोस्रो राहदानीका लागि फाराम भर्ने । सरकारले फाराम भर्नका लागि अनलाइन सुविधा दिएको छ, तर अधिकांश भर्न नसकेर पसलमा धाउने गरेका छन् । पसलेले पनि यही हो मौका भनेर जनही ३ सयदेखि ५ सय रूपैयाँसम्म लिने गरेको छ ।
जसोतसो अनलाइनमा फाराम भरेर प्रिन्ट गरी बाँकी काम गर्न फेरि कार्यालयमै पुग्नुपर्छ । राष्ट्रिय परिचयपत्रका लागि चितवनमा पुस महिनासम्मको मिति पुगेको छ । तर, अत्यावश्यकको हकमा भने बाध्यता र कठिनाइ हेरेर प्रशासनले गाँठो फुकाउने काम गरिरहेको छ । सुरूमा फाराम भर्न पसलमा लाइन बसेका युवाहरु आफ्नो पालोअनुसारको मिति तोकिएपछि त्यसदिन पनि लाइनमा बस्न बाध्य हुन्छन् । परिचयपत्र बनेपछि राहदानीका लागि मिति लिन पुनः फाराम भर्नुपर्ने हुन्छ । जिल्ला प्रशासन चितवनले बेलुकी ४ बजेपछि केही मिनेट समय छुट्टयाएको छ । तर, त्यो समयमा जो पायो त्यसले फाराम दर्ता गर्न सक्दैन । दर्ता गरिदिन पुनः पसलेको सहारामा पुग्नुपर्छ । पसलेले त्यहाँ पनि निश्चित रकम लिन्छ । धेरै प्रयासपछि फाराम भरिन्छ तर भनेजस्तो छिटो मिति पाइँदैन । भनेको मितिमा आउँदा ९ बजेदेखि नै सेवाग्राहीको भीड लाग्छ ।
फाराम रूजु, बैंक दस्तुर भुक्तान र फोटो खिच्ने कामका लागि ३ देखि ४ घन्टा नै बिताउनुपर्ने बाध्यता सेवाग्राहीको छ । पछि राहदानी बनेर लिन आउँदा पनि केही समय लाइन बस्नुपर्ने बाध्यता छ । चितवनका सहायक प्रमुख जिल्ला अधिकारी चिरञ्जीवी शर्माले बसाइसराई र सहजताका कारण चितवनमा सेवाग्राही बढी हुने गरेको बताए । ‘फाँटमा आवश्यकताअनुसार जनशक्ति व्यवस्थापन प्रयास भएको छ’, उनले भने, ‘काममा सहजताका लागि अझै योजना बनाइरहेका छौँ । काम नभएर सेवाग्राही फर्किने अवस्था दिएका छैनौँ, कतिपय अवस्थामा हामीले नै जोखिम लिएर पनि व्यावहारिकताका आधारमा सेवा दिएका छौँ ।’
राहदानीका लागि आगामी अगस्त महिनासम्मका लागि फाराम बुकिङ भैसकेको जिल्ला प्रशासन राहदानी फाँटका अधिकृत ऋषिराम शर्माले यस अनलाईनलाई बताए ।
