काठमाडौं, साउन १४ । नेपाली काँग्रेसको भातृ संस्था नेपाल राष्ट्रिय मगर संघको केन्द्रीय सभापतिमा दिनेश थापा मगर चयन भएका छन् । शनिबार काँग्रेसको केन्द्रीय कार्यालय सानेपामा बसेको संघको केन्द्रीय समिति बैठकले थापा मगर सभापतिमा सर्वसम्मत चयन गरेका हुन् ।
लामो समयदेखि पार्टीमा रहेर विभिन्न जिम्मेवारी सम्हाल्दै आएका थापा मगर नेपाली कांग्रेसको सूचना सञ्चार तथा प्रचार विभागको निवर्तमान सचिव हुन् । नेपाल राष्ट्रिय मगर संघको संस्थापक सचिव, महासचिव, उपसभापति हुँदै सभापति बनेका थापा मगरले लोकतन्त्रमा आस्थावान मगर समुदायलाई पार्टी एवं राज्यका विभिन्न तहमा स्थापित गर्न आफ्नो भुमिका केन्द्रित रहने बताए ।
साथै निर्धारित समयमा नै राष्ट्रिय महाधिवेशन गरी नेतृत्व हस्तान्तरण गर्न आफु प्रतिबद्ध रहेको उनले बताए ।
