दाङ, साउन १७ । दाङको राप्ती गाउँपालिकामा करेन्ट लागेर एक दम्पतीको ज्यान गएको छ । सोमबार दिउँसो साढे १ बजेतिर राप्ती गाउँपालिका – २ का २८ वर्षीय बासु गाहा मगर र उनकी २५ वर्षीया श्रीमती हिमाको घरमा करेन्ट लागेर मृत्यु भएको हो ।
इलाका प्रहरी कार्यालय भालुवाङका प्रमुख प्रहरी निरीक्षक सुजनविक्रम शाहका अनुसार करेन्ट लागेकी भाउजूलाई बचाउन खोज्दा देवर र देउरानीको मृत्यु भएको हो । उनीहरूको घटनास्थलमै मृत्यु भएको शाहले बताए । उनीहरूका तीन वर्षीय छोरा छन् । करेन्ट लागेकी बासुकी भाउजू २७ वर्षीया भिमा सामान्य घाइते भएकी छिन् ।
उनको स्थानीय अस्पतालमा उपचारपछि सोमबार बेलुका डिस्चार्ज भएको प्रहरी निरीक्षक शाहले जानकारी दिए । दुइटा खम्बाको बीचमा बाँधेको तारमा कपडा सुकाउदा भिमालाई खम्बामाथिबाट प्रवाह भएको करेन्टले छोएको थियो । घटनास्थलको प्रकृति नियाल्दा पानी परेको बेला जस्तापाताबाट करेन्ट प्रवाह भएको अनुमान गरिएको प्रहरी निरीक्षक शाहले बताए ।
‘भाउजू भिमालाई करेन्ट लागेपछि बचाउन भनेर देउरानी हिमा दक्षिण कुनोबाट र देवर बासु उत्तरतर्फबाट दौडिएर गएको देखिन्छ,’ शाहले भने, ‘पहिला हिमाले भिमालाई तान्न खोजिन् । उनलाई पनि करेन्ट लागेपछि बासुले हिमालाई तान्न खोजेको देखिन्छ । हिमालाई छुटाउन बासुले काँचो काठले तारमा हानेको र तार चुँडिएर उनको शरीरमा परेपछि उनको पनि घटनास्थलमै मृत्यु हुन पुग्यो ।’
करेन्ट लागेर मृत्यु भएका बासु र हिमाको शव पोस्टमर्टमका लागि लमही अस्पतालमा लगिएको प्रहरीले जनाएको छ ।
