पोखरा । गण्डकी प्रदेश सरकारले सवारी करमा वृद्धि गरेको भन्दै गण्डकी प्रदेशका सार्वजनिक यातायात व्यवसायीहरुले सार्वजनिक गाडी घरग्यारेजमै थन्काउने घोषणा गरेको छ।
जनता मूल्यवृद्धिबाट पीडित भइरहँदा सरकारले गैरजिम्मेवार भई कर बढाएर असुल्न लागिपरेकाले आन्दोलनको घोषणा गर्नुपरेको महासंघले बुधबार विज्ञप्ति जारी गरि सार्वजनिक गाडी घरग्यारेजमै थन्काउने घोषणा गरेको हो ।
नेपाल यातायात व्यवसायी राष्ट्रिय महासंघ गण्डकीले २२ साउनदेखि प्रदेशभरका सार्वजनिक गाडी घरग्यारेजमै थन्काउने घोषणा गरेको छ । गण्डकी प्रदेशको यो निर्णय प्रति पूर्ण असहमति जनाउदै आन्दोलनमा जाने जनाएको छ ।
सरकारले पेशा व्यवसायलाई राहत दिनुपर्ने ठाउँमा उल्टै कर जरिवाना लगायतका आकासिदो मुल्यबृद्धिबाट आम सर्बसाधारण पीडित भइरहेका छन् । प्रदेशले आमनागरिकको अभिबवाकको भूमिका निर्बाह गर्नुको साटो गैरजिम्मेवार भइ आम नागरिकको हित बिपरित कर मात्रै असुल गरेको समेत आरोप लगाएको छ। यस आन्दोलनमामा भावना बिपरित प्रदेश सरकारबाट माग सम्बोधन नभएको खण्डमा अनिश्चित काल बन्द गर्ने समेत चेतावनी दिएका छन्।
गण्डकी प्रदेशमा चालु आर्थिक वर्ष २०७९-८० देखि सवारी क्षमताअनुसार कर ४ सय रुपैयाँदेखि १० हजार रुपैयाँसम्म बढेको छ । सवारी कर साझा विषय भएको भन्दै महासंघले निजी र पर्यटक सवारीलाई पनि घरग्यारेजमा थन्क्याएर कर वृद्धिको विरोधमा आउन आह्वान समेत गरेको छ ।
प्रदेश सरकारले सवारी करको जरिवाना साउनदेखि २ सय प्रतिशत लिएको थियो । पछि सवारी धनीले विरोध गरेपछि जरिवाना २० प्रतिशत बनाइएको थियो।
