टोप कामु मगर
पाल्पा । पाल्पाको रामपुरमा जिप र अटो ठोक्किएर भएको सवारी दुर्घटनामा एक जनाको ज्यान गएको छ । निस्दी गाउँपालिका-२, सहलकोटका ४५ वर्षीय चोपबहादुर ढेंगाको उपचारका क्रममा शनिबार निधन भएको प्रहरीले जनाएको छ।
रामपुर नगरपालिका–५, सानी अमराईमा भएको दुर्घटनाका घाइते ढेंगाको उपचारका क्रममा तानसेनस्थित मिसन अस्पतालमा निधन भएको हो।
रामपुरको बेझाँड बजारबाट विजयपुरतर्फ जाँदै गरेको लु१ह ४१३८ नम्बरको अटो र तानसेनबाट रामपुर बेझाँड जाँदै गरेको लु१ज ४१३३ नम्बरको जिप ठोक्किएको थियो। दुर्घटनामा रामपुर नगरपालिका–३, ओइरेघाटका ३९ वर्षीय सुरेन्द्र थापा क्षेत्री, उनकै छोरी १० वर्षीया अञ्जली थापा क्षेत्री र १२ वर्षीया पुष्पा थापा क्षेत्री घाइते भएका छन्।
सुरेन्द्र र अन्जलीको लुम्बिनी मेडिकल कलेज प्रभास पाल्पामा उपचार भइरहेको प्रहरीले जनाएको छ। जिप र चालकलाई प्रहरीले नियन्त्रणमा लिएर अनुसन्धान गरिरहेको छ।
