पोखरा । आइतबारदेखि सवारी बन्द गर्ने निर्णय फिर्ता लिन राजी भएका छन् । यातायात व्यवसायी र गण्डकी प्रदेश सरकारबीच दुई बुँदे सहमति भएसंगै आन्दोलन फिर्ता भएको हो ।
गण्डकी प्रदेशका भौतिक पूर्वाधार, शहरी विकास तथा यातायात व्यवस्था मन्त्री कुमार खड्कासंग यातायात व्यवसायीबीच शनिबार छलफल भएपछि यातायात व्यवसायी आफ्नो आन्दोलनबाट पछि हटेका हुन् ।
यातायात व्यवसायीका मागका सम्बन्धमा आवश्यक निर्णय गर्न प्रदेशका मुख्यमन्त्री, विषयगत मन्त्रालयसंग वार्ता र संवादको माध्यमबाट तत्कालै छलफल गरिने भएपछि व्यवसायी आन्दोलनबाट पछि हटेका हुन् ।
छलफलमा मन्त्री खड्काका साथै नेपाल यातायात व्यवसायी राष्ट्रिय महासंघका केन्द्रीय अध्यक्ष विजय स्वार। वरिष्ठ उपाध्यक्ष पुण्यप्रसाद सिटौला (सरोज), हरिशरण केसी (हुस), महासचिव डेकनाथ गौतम, सचिव भानुभक्त बराल, महासंघका ट्याक्सी (वर्गीय संयोजक) प्रकाशमणि तिवारी, गण्डकी प्रदेश संयोजक केदार प्रसाद पौडेल, अखिल नेपाल यातायात मजदूर संघका गण्डकी संयोजक झम्कनाथ पौडेल, स्याङ्जा गण्डकी यातायात प्रालिका अध्यक्ष पुष्पराज पोखरेल, पोखरा यातायात प्रालिका प्रवन्ध निर्देशक अमृत शर्मा तिमिल्सिना र भौतिक पूर्वाधार, शहरी विकास तथा यातायात व्यवस्था मन्त्रालयका अधिकृत केदार सापकोटा सहभागी थिए ।
यातायात करमा भएको व्यापक वृद्धिको विरोध गर्दै महासंघले आइतबारदेखि आन्दोलन घोषणा गरेको थियो ।
सरकारले संघीयताको मर्म विरुद्ध मनोमानी ढंगले बढाएको आरोप लगाउँदै महासंघले कोरोना महामारीबाट थला परेका व्यवसायीलाई राहत दिनुपर्नेमा उल्टै अन्यायपूर्ण तरिकाले कर वृद्धि गरेको र त्यसकै विरोधस्वरुप आन्दोलन गर्न बाध्य भएको जनाएको थियो ।
