भरतपुर । भरतपुर महानगरपालिकाले संस्थागत विद्यालयको वर्गीकरण स्तरोन्नतिका लागि गृहकार्य सुरू गरेको छ ।
महानगरमा दुई दर्जनभन्दा बढी विद्यालयले स्तरोन्नतिको मागदाबी गरेपछि भरतपुर महानगर शैक्षिक प्रशासन महाशाखाले तल्लो वर्गीकरणमा परेका संस्थागत विद्यालयले स्तरोन्नतिको माग गरेपछि आइतबारबाट गृहकार्य सुरू गरेको हो ।
भरतपुर महानगरका नगर शिक्षा अधिकारी महेन्द्र पौडेलले भने, ‘विद्यालय स्तरोन्नति गर्न त उसको भौतिक पूर्वाधारदेखि सेवासुविधासम्म सबै जोडिन्छ, स्तरोन्नतिका लागि शिक्षा मन्त्रालयले तोकेका सबै मापदण्डहरु पूरा गर्नुपर्छ । त्यो पूरा छ कि छैन भनेर अनुगमन गरेका छौँ ।’ उनका अनुसार विद्यालयको वर्गीकरणअनुसार नै शुल्क वृद्धि जोडिएर आउँछ । भरतपुर महानगर शैक्षिक प्रशासन महाशाखाले आइतबार ३ वटा विद्यालयको अनुगमन गरेको छ ।
महाशाखा प्रमुख पौडेलले भने, ‘स्तरोन्नतिको माग गर्दै आएका कल्याणपुरको स्मल हेभन, वाल्मीकि शिक्षा सदन र अंकुरम एकेडेमीको आइतबार अनुगमन गरेका छौँ ।’ यी तीन विद्यालय हालको वर्गीकरणअनुसार ‘ख’ वर्गमा परेका छन् । यी विद्यालयले ‘क’ वर्गमा पर्नका लागि मागदाबी गरेका छन् । प्रमुख पौडेलले ‘क’ वर्गमा पर्न चाहने विद्यालयहरुले विभिन्न २० भन्दा बढी सूचीहरु पूरा गरेको कागजात पेश भएका छन् । उनले भने, ‘कागज मात्र हेरेर भएन, विद्यालय अनुगमन गरेर शिक्षकको सेवासुविधादेखि सम्पूर्ण भौतिक पूर्वाधार र शैक्षिक गुणस्तरसम्म निगरानी गरेका छौँ ।’
विभिन्न चरणको छलफल गरेर मात्र विद्यालयको वर्गीकरणमा स्तरोन्नति गरिने भरतपुर महानगर शैक्षिक प्रशासन महाशाखाले जनाएको छ । चितवनमा घ, ग, ख वर्गका संस्थागत विद्यालय मात्र छन् । भरतपुरमा हाल ‘ग’ श्रेणीका विद्यालयहरुले नर्सरीको एक हजार ४२५ र कक्षा १० को दुई हजार ६४० रूपैयाँ मासिक शुल्क लिएका छन् । त्यसैगरी ‘ख’ श्रेणीका विद्यालयहरुले यही शुल्कमा २५ प्रतिशत बढाएका छन् । ‘ख’ श्रेणीका विद्यालयहरुले लिएको शुल्कमा ‘क’ वर्गका विद्यालयहरुले अझ २५ प्रतिशत बढाएर शुल्क लिन पाउँछन् ।
