काठमाडौ । आगामी मंसिर ४ गते हुने संघ र प्रदेश सभा निर्वाचनको निम्ति नेपाल प्रहरीले ७ सय ५१ वटा गाडी खरिदको प्रस्ताव गरेको छ ।
निर्वाचन सुरक्षाका लागि हलुका तथा ठूला सवारीसाधन पर्याप्त नरहेको बताउँदै प्रहरीले ठूलो संख्यामा गाडी खरिदको प्रस्ताव राखेको हो ।
प्रस्तावअनुसार बजेट स्वीकृतिका लागि अर्थ मन्त्रालयमा फाइल पठाइएको बताइएको छ । गत स्थानीय तहको निर्वाचनअघि पनि प्रहरीले गाडी खरिदको प्रस्ताव गरेको थियो । त्यतिबेला सवारीसाधन खरिदका लागि बजेट माग गरे पनि सरकारले भाडामा सवारीसाधन ल्याउन बजेट छुट्टाएको थियो । प्रहरी प्रधान कार्यालयले गृहमा बुझाएको विवरणअनुसार अहिले प्रहरीलाई एक हजार पाँच सय ९८ मोटरसाइकलको अभाव छ ।
साना सवारीसाधन एक हजार तीन सय ८४ अपुग रहेको बताइन्छ । सात सय ५३ स्थानीय तहमा रहेका प्रहरीसँग एक हजार पाँच सय २९ साना र एक सय ५४ ठूला सवारीसाधन रहेको विवरण देखाइएको छ ।
