सुरेश यादव
नवलपरासी, श्रावण २५ । असल छिमेकी नेपालले पाल्हीनन्दन अस्पताललाई ७५ हजार ५ सय रुपैया बराबरको विभिन्न सामाग्रीहरु हस्तान्तरण गरेको छ । स्वास्थ्य तथा विपद क्षेत्रमा काम गर्दै आएको असल छिमेकी नेपालले पश्चिम नवलपरासीको पाल्हीनन्दन गाउँपालिका ४ स्थित पाल्हीनन्दन अस्पताललाई विभिन्न आवश्यक सामाग्रीहरु एक औपचारिक कार्यक्रम बिच हस्तान्तरण गरेको हो ।
संस्थाको एरिया ईन्चार्ज पुरन सोती मगरको अध्यक्षता तथा पाल्हीनन्दन गाउँपालिका उपाध्यक्ष फातुमा खातनु अंसारीको प्रमुख आतिथ्यतामा उक्त सामाग्रीहरु हस्तान्तरण गरिएको हो । संस्थाबाट अस्पताललाई प्राप्त सामाग्रीहरु कार्यक्रमकी प्रमुख अतिथि एवं गाउँपालिका उपाध्यक्ष फातुमा खातनुले अस्पतालको निमित्त प्रमुख मेडिकल अधिकृत डाक्टर किरण गुप्तालाई हस्तान्तरण गर्दै यसको भरपुर सदुपयोग गर्न आग्रह गर्नु भयो ।
अस्पताललाई हस्तान्तरण गरिएको सामाग्रीमा डस्टबिन १५ थान, पंखा १० थान, अफिस कुर्ची १ थान, टेबल १ थान गरि कुल ७६ हजार ५ सय रुपैयाको सामाग्री रहेको छ । संस्थाद्वारा जिल्लामा संचालित विपद प्रतिक्रिया तथा खाद्य सुरक्षाका लागि क्षमता अभिबृद्धि परियोजनामार्फत उक्त अस्पताललाई ति सामाग्रीहरु हस्तान्तरण गरिएको संस्थाको एरिया ईन्चार्ज तथा कार्यक्रम सहायक अधिकृत सोती मगरले जानकारी दिनु भयो । उहाँले आगामी दिनमा अस्पताललाई आवश्यक थप स्वास्थ्य सामाग्रीहरु प्रदान गर्ने र सो क्षेत्रमा पनि स्वास्थ्यप्रति आमजनताहरुलाई थप सचेत गराउने कार्यक्रममा संस्थाको महत्त्वपुर्ण भुमिका रहने बताउनु भयो ।
कार्यक्रममा प्रमुख अतिथि गाउँपालिका उपाध्यक्ष फातुमा खातनु अंसारी, गाउँपालिका वडा ४ का अध्यक्ष रबिन्द्र सहानी लगायतले यस्तो सामाजिक कार्यको प्रशंसा गर्दै सामाजिक क्षेत्रमा काम गर्न विभिन्न संघसंस्थाहरुलाई हातेमालो गरेर अगाडी बढन आग्रह गरे ।
असल छिमेकी नेपालले जिल्लामा डिजास्टरको क्षेत्र काम गरिरहेको छ भने विगतका बर्षदेखि नै सरावल तथा पाल्हीनन्दन गाउँपालिकामा सामुदायिक शसक्तिकरण, जिविकोपार्जन र स्वास्थ क्षेत्रमा काम गर्दै आएको कार्यक्रम सहायक अधिकृत सोतीले जानकारी दिनु भयो । संस्थाले महिलाहरुको शसक्तिकरणका लागि यहि श्रावण २४ गते मंगलवार पनि सरावल ६ का महिलाहरुलाई बाख्रा पालन तालिम पनि प्रदान गरेको हो ।
