नवलपुर, भदौ २१ । सत्तारुढ दल नेपाली कांग्रेसका केन्द्रीय सदस्य विनोद चौधरीको नाम प्रतिनिधिसभा प्रत्यक्षतर्फ उम्मेदवारमा तीन ठाउँबाट सिफारिस भएको छ । प्रतिनिधिसभा सदस्यसमेत रहेका चौधरीको नाम नवलपरासीको क्षेत्र नं. १ का साथै नवलपुर निर्वाचन क्षेत्र नं. १ र २ बाट प्रत्यक्षतर्फ उम्मेदवारमा सिफारिस भएको हो ।
नवलपरासी १ मा कांग्रेस नेता चौधरीसहित पाँच जनाको नाम सिफारिस भएको छ । त्यस्तै नवलपुर क्षेत्र नं. १ भने कांग्रेसका पूर्वमहामन्त्री डा. शशांक कोइरालाको निर्वाचन क्षेत्र हो । उनी तीन पटक यहि निर्वाचन क्षेत्रबाट निर्वाचित भएका हुन् । यसपटक पनि पूर्वमहामन्त्री कोइरालाले निर्वाचन लड्ने आकांक्षा राखेका छन् ।
नवलपुर क्षेत्र नं. २ मा कांग्रेस नेता एवं उद्योगी चौधरीलाई उम्मेदवार बनाउनुपर्ने स्थानीयको माग छ । उनले उक्त क्षेत्रमा पछिल्लो समय व्यापक सक्रियता बढाएका छन् । चौधरीले पार्टीको निर्णय अनुसार आफू जहाँबाट पनि चुनावमा उठ्न तयार रहेको बताउँदै आएका छन् । कांग्रेसले अघिल्लो पटक समानुपातिक सूचीमा रहेका नेताहरुलाई यसपटक नदोहोर्याउने नीति लिएको छ ।
उनी ०७४ सालमा समानुपातिकतर्फ सांसद बनेका हुन् । चौधरीले टिकट पाउने पक्कापक्की भए पनि निर्वाचन क्षेत्र भने यकिन भएको छैन ।
