चितवन, भदौ २६ । चितवनको माडीमा जंगली जनावरको आक्रमणबाट एक जनाको ज्यान गएको छ । मध्यवर्ती सामूदायिक वन अमलियामा शनिबार गाइबस्तु चराउन गएका माडी नगरपालिका – २ ढिकुनेका ६८ वर्षीय सुर्यनाथ अधिकारीको जंगली जनावरको आक्रमणबाट मृत्यु भएको हो ।
शनिबार साझबाट बेपत्ता भएका उनको शव आइतबार बिहान साढे आठ बजे जनावरले खाएको अवस्थामा फेला परेको हो । शवको प्रकृति हेर्दा बाघले खाएको हुन सक्ने जिल्ला प्रहरी कार्यालय चितवनका प्रवक्ता डिएसपी बिजयराज पण्डितले बताए ।
सुर्यनाठ शनिबार आफ्ना २५ वर्षीय छोरा होमबहादुर अधिकारीसँगै भैंसी चराउन गएका थिए । बेलुका छोरा फर्कंदा पनि सुर्यनाथ नफर्किएपछि परिवारले आज बिहान करिब साढे ७ बजे प्रहरीलाई खबर गरेका थिए । खबर पाउनासाथ सूर्यनाथको खोजीमा खटिएको टोलीले एक घण्टामा उनको शव फेला पारेको हो ।
