कावासोती । नवलपरासी (बर्दघाट सुस्तापूर्व) नवलपुरको सबै क्षेत्रमा यसै वर्ष विद्युत पुग्ने भएको छ । आठवटा पालिकाका रहेको यस जिल्लामा ९२ वडामा यस वर्ष विद्युत पुग्ने नेपाल विद्युत प्राधिकरण कावासोती नवलपुर शाखाका इञ्जीनियर निश्चल अधिकारीले बताउनु भएको छ ।
नवलपुर जिल्लाका ‘अधिकांश क्षेत्रमा विद्युत पुगेको छ, केही वडा बाँकी रहेका छन्’, उनले भने, ‘बाँकी रहेका वडामा समेत यसै वर्ष विद्युतीकरणको काम सकिन्छ ।’ उनले भने ।
गण्डकी प्रदेश सरकारको ‘उज्यालो गण्डकी प्रदेश’ योजनाअनुसार प्रदेश अन्तरगत सबै जिल्लाको सबै क्षेत्रमा विद्युत पुर्याउने लक्ष्यअनुसार नवलपुर जिल्लामा समेत विद्युतीकरणको काम तीब्र भएको छ । उनका अनुसार मुख्य गरी विद्युत नपुगेका पहाडी क्षेत्रका गाउँपालिका बुलिङटार र बौदिकालीका केही वडामा अहिले पनि विद्युतीकरणका लागि काम चलिरहेको छ । बौदिकालीका वडा नं ५ र ६ मा विद्युतीकरणका लागि धेरै बाँकी रहेको उनले बताए ।
नवलपुरको पहाडी क्षेत्रमा बाटोको समस्याले विद्युत वितरण गर्न समस्या देखिए पनि धेरै स्थानमा तार, पोल पुर्याउने काम सकिएकाले मिटर जडानको काम मात्रै बाँकी रहेको इञ्जीनियर अधिकारीले बताए । ‘नयाँ बस्ती थपिँदै जाँदा थप काम रहन्छ नै, तर भएका हालका हरेक क्षेत्रमा विद्युत पु¥याउन हामी केन्द्रित छौँ’, इञ्जीनियर अधिकारीले भने, ‘अहिले पनि पहाडका विभिन्न स्थानमा तार पोल पु¥याइएको छ, चाँडै बत्ती बाल्ने काम हुन्छ ।’
सामुदायिक विद्युतीकरण, लघु जलविद्युत, सौर्य ऊर्जाबाट केही क्षेत्रमा विद्युत पुगेको भए पनि चाँडै ती क्षेत्रमा समेत राष्ट्रिय प्रसारण लाइनको विद्युत विस्तार हुने जनाइएको छ । नवलपुर जिल्लाको पहाडी गाउँपालिका अन्तर्गतका बौदिकाली र बुलिङटारका विभिन्न क्षेत्रमा हाल तनहुँ खैरेनीटारबाट विद्युत वितरण गरिएको छ । तर लामो दूरीबाट ल्याएको विद्युतमा विभिन्न समस्या हुने हुँदा जिल्लाकै बोझापोखरीमा निर्माणधीन सबस्टेशनको काम सकिएपछि पहाडी क्षेत्रमा विद्युतीकरणमा थप सहजता मिल्ने उनले बताए । बोझापोखरीमा विद्युत सबस्टेशन निर्माणको काम अन्तिम चरणमा रहेको छ । यस योजना अन्तर्गत अहिले पोल गाड्ने र तार टाँग्ने काम भैइरहेको छ ।
नवलपुर जिल्लाकै दुम्कीबासमा समेत नयाँ विद्युत सबस्टेशन निर्माणको प्रक्रिया चलिरहेको छ । दुम्कीबास क्षेत्रमा नवलपरासी पश्चिमबाट दाउन्ने हुँदै विद्युत ल्याइएकाले बेलाबेलामा समस्या हुने गरेकाले दुम्कीबासमा विद्युत सबस्टेशन निर्माणपछि त्यस क्षेत्रको समस्यासमेत समाधान हुने उनले बताए ।
नवलपुरमा विद्युत वितरणको अवस्था सुधारका लागि केन्द्रबाट समेत ‘नवलपुर विद्युतीकरण योजना’ सञ्चालनका क्रममा रहेको इञ्जीनियर अधिकारीले बताए । लघु जलविद्युतबाट विद्युत वितरण भएका क्षेत्रमा राष्ट्रिय प्रसारणको लाइन पुर्याउने, आवश्यकतानुसार नयाँ ट्रान्सफर्मर वितरण, तारपोल पुर्याउने, हाल विद्युत् बाँडिएका क्षेत्रमा विद्युतको क्षमता बढाउनेलगायतका काम यस योजनामा सञ्चालन हुने उनकाे भनाइ छ ।
‘समग्र जिल्लाको विद्युतीकरण सुधार गर्न नवलपुर विद्युतीकरण योजना सञ्चालनमा रहेको छ’, उनले भने, ‘यसले जिल्लाको समग्र विद्युत वितरणलाई प्रभावकारी बनाउन थप मद्दत पुग्नेछ ।’ नवलपुर टुडेबाट साभार
