चितवन, कात्तिक ३ । सत्ता गठबन्धनको तर्फबाट चितवन २ मा प्रतिनिधिसभा सदस्य पदका उम्मेदवार तथा राज्यमन्त्री उमेश श्रेष्ठले बिहीबार कालिका नगरपालिकामा भइरहेको श्रीमद्भागवत महापुराणमा सहभागी मूर्ति र पैसा वितरण गरेका छन् । चुनावी प्रसारप्रसार धाइरहेका श्रेष्ठले महापुराणमा गणेशको मूर्ति र २५ हजार रुपैयाँ वितरण गरेका हुन् ।
कार्यक्रममा आर्थिक तथा भौतिक सहयोगको घोषणा गर्दै श्रेष्ठले कालिकालाई पर्यटकीय क्षेत्र बनाएर यसको विकास गर्नुपर्ने बताए । उनले यस नगरभित्र हरित औद्योगिक क्षेत्र निर्माण गरी रोजगारीका अवसर सिर्जना गरिने पनि बताए । सोही क्रममा श्रेष्ठले सबै धर्मप्रति आफ्नो समभाव रहेको धाराणा व्यक्त गरे ।
धार्मिक महोत्सव आयोजकले चितवन २ बाट प्रतिनिधिसभा सदस्य पदका उम्मेदवार उमेश श्रेष्ठ र चितवन २ (क) बाट प्रदेशसभा सदस्य पदका उम्मेदवार घनश्याम दाहाललाई रामनामी र फूलमाला लगाइदिएर स्वागत एवम् सम्मान गरेका थिए ।
चितवन २ अन्तर्गत पर्ने कालिका नगरपालिका–३ पदमपुर, गणेश मन्दिर चोकमा कात्तिक १ गतेदेखि श्रीमद्भागवत महापुराण सप्ताह ज्ञान महायज्ञ एवम् धार्मिक महोत्सव चलिरहेको छ । कात्तिक ७ गतेसम्म चल्ने धार्मिक महोत्सव सिद्दि गणेश मन्दिरको धार्मिक तीर्थस्थल स्तरोन्नति, व्यवस्थापन, संरक्षण एवं भौतिक पूर्वाधार विकासका लागि आर्थिक सहयोग जुटाउन आयोजना गरिएको हो ।
