कालिकोट । कालीकोटको तिलागुफा नगरपालिका–१० रानाबाडाँमा बम विस्फोट हुँदा एक बालिकाको ज्यान गएको छ। जिल्ला प्रशासन कार्यालय कालीकोटका अनुसार ज्यान गुमाउनेमा स्थानीय ४ वर्षीय झरना थापा रहेकी छन्।
शनिबार बिहान करिब ८ बजे बम विस्फोट भएको कालीकोटका प्रमुख जिल्ला अधिकारी रामहरि शर्माले बताए।
यस्तै घाइते हुनेमा ७ वर्षीय कमल थापा, ५ वर्षीय मुस्कान थापा, ४ वर्षीय सरस्वती थापा र ३ वर्षीय पखना थापा घाइते भएका शर्माले बताए। घाइतेहरूलाई गृह मन्त्रालयको पहलमा नेपाली सेनाको हेलिकप्टरबाट उद्धार गरेर प्रदेश अस्पताल कालागाउँ सुर्खेतमा लगिएको छ।
गृहमन्त्री बालकृष्ण खाँणले घाइते बालबालिकाको उद्धारका लागि घटनास्थलमा हेलिकप्टर पठाउन गृह प्रशासनलाई निर्देशन दिएका छन्।
घाइते बालबालिकाको अवस्था गम्भीर रहेको बताइएको छ। घटनास्थलमा बम कसले र किन राखेको हो भन्नेबारे खुल्न नसकेको प्रहरीको भनाइ छ।
