कावासोती, कात्तिक १३ । प्रधानमन्त्री शेरबहादुर देउवाले नवलपुरको बुलिङटारमा भएको बस दुर्घटनाप्रति दुःख व्यक्त गरेका छन्।
प्रधानमन्त्री देउवाले आज बिहान ट्विट गर्दै पाल्पाको रम्भा गाउँपालिकाको हुँगीबाट मनकामना जाँदै गरेको बस नवलपुरको बुलिङटार – २ मथारमा दुर्घटनामा परेको खबरले आफू स्तब्ध भएको बताएका हुन्।
उनले दुर्घटनामा परी ज्यान गुमाएकाहरुप्रति श्रद्धाञ्जली व्यक्त गर्दै शोकाकुल परिवारजनमा समवेदना प्रकट गरेका छन्।
प्रधानमन्त्री देउवाले सो दुर्घटनाबाट घाइते भएकाहरुको तत्काल उपचारको प्रबन्ध गर्न सम्बन्धित निकायलाई निर्देशन दिएका छन्।
पाल्पाबाट गोरखाको मनकामना जाँदै गरेको एक बस आज बिहान नवलपुरको बुलिङटार गाउँपालिका मथारमा, दुर्घटनाग्रस्त हुँदा पाँच जनाको ज्यान गएको छ भने ३० जना घाइते छन्।
