नवलपरासी, कार्तिक १९ । पुर्व स्वास्थ्य मन्त्रीसमेत रहेका नवलपरासी क्षेत्र नम्बर १ का उम्मेदवार हृदेयश त्रिपाठीले कोरोनाको भ्याक्सिन खरिद गर्दाको कमिसन काण्डका बारेमा अहिले मतदाताको सामना गर्नु परेको छ । चुनावी अभियानमा रहेका त्रिपाठीलाई टोलटोलमा जादा यहाँका मतदाताले यहि प्रश्न तेस्र्याएका छन् ।
कोरोना महामारीका समयमा त्रिपाठी स्वास्थ्य मन्त्रीको जिम्मेवारीमा थिए । कोरोनाले देशभरका नागरिक आहत भईरहदा देशभरबाट शिघ्र खोप व्यवस्थापनका लागि सरकारमाथि दवाव परेको थियो । सरकारले खोप आयातका लागि कोभिसिल्डसँग सम्झौता गरेपछि पहिलो चरणको खोप आयात भएको थियो । तर, दोस्रो चरणको खोप आयात अवरुद्ध गरेर त्रिपाठीले कसिमन काण्ड घटाएका थिए । जुन समाचार त्यतिबेलै कान्तिपुर लगायत देशका प्रमुख समाचार माध्यममा प्रमुखताकासाथ प्रकाशित भएको थियो ।
केपी ओली नेतृत्वको एमाले सरकारको स्वास्थ्य मन्त्री बनेका त्रिपाठीले खोप खरिद गर्दा बालुवाटारबाटै डिल भएको भन्दै कमिसनको खेलमा प्रधानमन्त्री नै संलग्न रहेको आरोप लगाएका थिए । पहिलो डोज खोप लगाएका करिब २ लाख नागरिकलाई अनिवार्य लगाउनु पर्ने दोस्रो डोज खोप लगाउन बन्चित गरेर मन्त्री त्रिपाठी कमिसनको खेलमा रहेको समाचार कान्तिपुरमा प्रकाशित भएको थियो ।
कोभिसिल्डको दोस्रो डोज खोप आयात गर्दा तत्कालिन प्रधानमन्त्री ओलीले आफु निकटका ब्यापारी सुरज बैद्यलाई कमिसन एजेण्ट बनाएर करौडौ रुपैयाँको घोटाला गर्न लागिएको आरोप पनि त्रिपाठीले लगाएका थिए । गत निर्वाचनमा एमालेबाटै चुनाव जितेका त्रिपाठीले पार्टी अध्यक्ष एवं प्रधानमन्त्रीमाथि आरोप लगाएपछि एमालेले उनलाई वेवास्ता गर्न थालेको थियो । एमालेमा कुनै हैसियत नहरने अवस्था आएपछि त्रिपाठीले जनता प्रगतिशिल पार्टी खोलेका थिए ।
नवलपसारीको प्रतापपुरमा घरदैलो गर्दै हिडेका त्रिपाठीलाई स्थानीय श्याम पाण्डेले आफ्नी बृद्ध आमाले कोभिसिल्डको दोस्रो डोज खोप लगाउन नपाएको त्यसको कारण त्रिपाठीको कमिसन मोह रहेको भन्दै आक्रोश पोखे । स्वास्थ्य मन्त्री रहेका बेलामासमेत यहाँका जनतालाई खोप लगाउने व्यवस्था मिलाउन आवस्यक ठान्नु भएन । यस्तो गैर जिम्मेवार व्यक्तिलाई फेरी चुनाव जिताउनुको के अर्थ रहन्छ ? पाण्डेले भने ।
बर्दघाट नगरपालिकाका चुनावी भेटघाटमा पनि त्रिपाठीले मतदाताको यहि प्रश्नको सामना गर्नु परेको छ । बर्दघाट नगरपालिका – २ का विशाल पौडेलले प्रश्न गरे– तपाईँले कोरोनाको समयमा हामीलाई खोपकोसमेत व्यवस्था गर्न आवस्यक ठान्नु भएन । उल्टो कमिसन नपाएका कारण खोप आयात रोकिएको समाचार नेपालका राष्ट्रिय दैनिक र अनलाईनहरुमा पढ्नुपर्दा हाम्रो शिर निहुरिएको छ । हाम्रो भोटलाई तपाईँले कमिसन सँग साट्दै आउनु भएको छ ।
कमिशन काण्डमा प्रधानमन्त्रीलाई नै मुछ्ने प्रयास गरेपछि ओलीले त्रिपाठीलाई स्वास्थ्य मन्त्रीबाट हटाएका थिए ।
