धनुषा, कात्तिक २० । धनुषामा सुमो दुर्घटना हुँदा एक नवजात शिशुको मृत्यु भएको छ । धनुषाको लक्ष्मीनिया गाउँपालिकामा ना३च ३५७५ नम्बरको टाटा सुमो अनियन्त्रित भई दुर्घटना हुँदा दुईदिने शिशुको मृत्यु भएको हो । सो दुर्घटनामा अन्य ७ जना घाइते भएका छन् ।
जिल्ला प्रहरी कार्यालय धनुषाका प्रवक्ता प्रहरी नायव उपरीक्षक प्रदिपबहादुर क्षेत्रीका अनुसार जनकपुरबाट महेन्द्रनगरतर्फ जाँदै गरेको सुमो अनियन्त्रित भई दुर्घटना भएको हो । उक्त सुमोमा सवार ८ जनामध्ये ६ जना सामान्य घाइते, १ जना गम्भीर घाइते भएको र मिथिला नगरपालिका हरिहरपुरकी सन्जुदेवी महतोको २ दिने शिशुको मृत्यु भएको प्रहरी प्रवक्ता क्षेत्रीले बताए ।
यस्तै घाइते हुनेमा क्षिरेश्वरनाथ नगरपालिका–७ की २४ वर्षीय राधादेवी सिंह र ४० वर्षीय फुलोदेवी महतो, मिथिला नगरपालिका–३ की ६० वर्षीय कमलीदेवी र चन्द्रकला महतो साथै सोही पालिका १ की १५ वर्षीय सुधीसिंह र लक्ष्मीनियाँ गाउँपालिका–६ वगेवा बस्ने चालक सिकिन्द्र ठाकु शर्मा रहेको धनुषा प्रहरीले जनाएको छ ।
चन्द्रकला महतोको अवस्था गम्भीर रहेको छ । उनको टाउकोमा चोट लागेको अस्थायी प्रहरी पोस्ट लक्ष्मीनियाँ बजारले जनाएको छ । दुर्घटनामा घाइते भएकालाई उपचारका लागि नजिकैको सेन्ट्रल हस्पिटलमा लगिएको छ ।
