पोखरा, कात्तिक २१ । गण्डकी प्रदेश सरकारले यसअघि गरेको करको दर घटाउने निर्णय खारेज गरेको छ । निर्वाचन आयोगले करको दर घटाउने निर्णयबारे दोस्रो पटक स्पष्टीकरण सोधेपछि गण्डकी प्रदेश सरकारले निर्णय खारेज गरेको हो ।
आयोगले प्रदेश सरकारलाई कात्तिक ४ गते पहिलोपटक स्पष्टीकरण सोधेको थियो । बुधबार पनि दोस्रो पटक २४ घण्टे स्पष्टीकरण सोधिएको हो । तर, मुख्यमन्त्री कार्यालयमा सोमबार बिहान ११ बजेमात्र पत्र प्राप्त भएको मुख्यमन्त्री स्रोतले जनाएको छ । सोही पत्र अनुसार गण्डकी प्रदेश सरकारले करको दर घटाउने निर्णय खारेज गरेको र यसबारे आयोगलाई आजै जानकारी गराउने तयारी गरेको छ ।
प्रदेश सरकारले ७ असोजको मन्त्रिपरिषद् बैठकबाट करको दर घटाउने निर्णय गरेको थियो । त्यतिबेला प्रदेशका अर्थसचिव बिदामा बसेका कारण २७ असोजमा सो निर्णय राजपत्रमा प्रकाशित भएको थियो । निर्वाचनको सम्मुखमा आचारसंहिताविपरीत करको दर घटाइएको भन्दै मुख्यमन्त्री, अर्थमन्त्री र अर्थसचिवलाई आयोगले अलग-अलग स्पष्टीकरण सोधेको थियो ।
