चितवन, कात्तिक २२ । चितवन निर्वाचन क्षेत्र नम्बर २ मा गठबन्धनको तर्फबाट प्रतिनिधि सभा सदस्यका उम्मेद्वार उमेश श्रेष्ठले चितवन २ मा १० हजार युवालाई रोजगार दिने घोषणा गरेका छन् । चुनाव प्रचारप्रसारमा रहेका श्रेष्ठले घरदैलो गर्ने क्रममा जनतासामु यस्तो बाचा गरेका हुन् ।
उनले चितवनमा राष्ट्रिय, बहुराष्ट्रिय उद्योगहरु भित्र्याएर, शक्तिखोर औद्योगिक क्षेत्र निर्माण गरेर हजारौं रोजगारी सृजना गर्ने बताए । इच्छाकामनाका पहाडहरुमा लघुउद्यम सञ्चालन गरेर यहाँको समग्र आर्थिक विकास र रोजगार सृजना गर्ने उनको प्रतिवद्धता छ । यस्तै महिलाहरुलाई स्वरोजगार बन्न तालिम प्रदान गर्ने, युवाहरुलाई विभिन्न सीपमुलक तालिम दिने र विदेशिनु पर्ने बाध्यता हटाएर यही ठाउँमा काम गर्न सक्ने गरी वातावरण सिर्जना गर्ने उनको बाचा छ ।
श्रेष्ठले निर्वाचनमा रुख चिन्हमा मतदान गरी आफूलाई अत्याधिक मतले विजयी गराउन जनताहरु समक्ष अपिल गर्दै घरदैलो गरिरहेका छन् । चुनावपछि लोकतान्त्रिक बामगठबन्धनकै सरकार बन्ने दाबी गर्दै उनले आफू पुनः मन्त्री बन्ने संभावना रहेको दाबी गरे । मन्त्री भएपछि यो क्षेत्रमा ठूलाठूला योजना भित्र्याउन सहज हुने भन्दै उनले आफूलाई जिताउन अपिल गरेका छन् ।
