विराटनगर, कात्तिक २३ । प्रदेश १ का वन वातावरण तथा भू–संरक्षणमन्त्री शेखरचन्द्र थापाको आज बिहान निधन भएको छ । मोरङ क्षेत्र नम्बर ३ (१) को प्रदेशसभाका उम्मेदवारसमेत रहेका थापाको ५६ वर्षको उमेरमा नोबेल अस्पतालमा उपचारको क्रममा निधन भएको हो ।
सुरूमा डेंगी संक्रमण देखिएको उनलाई एक महिना अगाडिदेखि निमोनियाले ग्रसित पारेका थिए । नोबेल मेडिकल कलेजका डाइरेक्टर राजेश नेपालका अनुसार थापाको आज बिहान १० बजेर ४० मिनेटमा निधन भएको हो । उनको मृत्यु भएसँगै मोरङ क्षेत्र नम्बर ३ (१) प्रदेशसभाको निर्वाचन स्थगित हुने भएको छ । थापा सत्ता गठबन्धनको तर्फबाट उम्मेदवार बनेका थिए ।
उनी गत असोज २३ गते देखि नै अस्वस्थ थिए । त्यसको भोलिपल्ट उपचारका लागि नोबेल अस्पताल भर्ना भएका उनलाई त्यहाँ उपचार हुन नसकेपछि असोज २७ गते हेलिकप्टरबाट काठमाडौंस्थित ह्याम्स अस्पताल लगिएको थियो । त्यहाँ केही दिन उपचारपछि उनलाई दुई दिन अगाडि बेड रेस्टको लागि भन्दै नोबेल अस्पताल ल्याइएको थियो ।
थापाको साथमा उनकी श्रीमती लक्ष्मी कार्की र छोरा सुलभ थापा छन् । २०५७ सालदेखि लगातार ८ वर्षसम्म गिरिजाप्रसाद कोइरालाको स्वकीय सचीव भएर काम गरेका थिए । उनलाई सो क्षेत्रमा सादगी र आदर्शवान नेताको रुपमा सर्वसाधरणले चिन्थे ।
