वीरगञ्ज, कात्तिक २७ । वीरगञ्ज महानगरपालिकामा जसपा–एमाले गठबन्धनको चुनावी प्रचारप्रसारमा आचार संहिताको उल्लंघन भएको पाइएको छ । प्रतिनिधी सभा र प्रदेश सभाको निर्वाचन नजिकिँदै गर्दा जसपा–एमाले गठबन्धनले प्रचार प्रसार तथा घरदैलो जस्ता कार्यक्रलाई तिव्रता दिएको छ ।
गठबन्धनले कार्यक्रममा तिव्रता दिएपनि आचार संहिताको व्यापक उल्लंघन गरेको पाइएको छ । निर्वाचन आयोगले बारम्बार आचार संहिताको उल्लंघन नर्गन पार्टी तथा उमेदवारहरुलाई निर्देशन गरीरहे पनि वीरगञ्जका जसपा–एमाले गठबन्धनले आयोगको निर्देशनलाई नजरअन्दाज गरि आचार संहिताको उल्लंघन गरेको मतदाताहरुले बताएका छन् ।
वीरगञ्ज महानगरपालिका वडा नं. ११ श्रीपुरमा जसपा–एमाले गठबन्धनले गरेको चुनावी प्रचारप्रसार तथा घरदैलो कार्यक्रममा बालबालीहरुलाई विभिन्न किसिमको प्रलोभन दिइ प्रयोग गरेको पाईएको छ । आइतबार विहान वडा नं. ११ श्रीपुरका वडाध्यक्ष अजय चौरसीयाको नेतृत्वमा आयोजना भएको घरदैलो कार्यक्रममा दस वर्ष उमेर मुनिका बालबालिकालाई विद्यालय जानबाट बन्चित गरी झण्डा तथा चुनावी पर्चा हातमा थमाई चुनावी प्रचार प्रसार भइरहेको छ ।
चुनावी प्रचारप्रसारमा बालबालिकाको प्रयोग हुदा सो क्षेत्रका आम मतदाताहरुको आपत्ति समेत रहेको बताइएको छ ।
निर्वाचन आयोग गर्छ त कारबाही ?
स-साना बालबालिकालाई कुनै पनि काम गराउन दण्डनीय मानिने गरिन्छ, तर निर्वाचनको समयमा त्यही बालबालिकालाई प्रयोग गर्दै आचार संहिताको उल्लंघन गर्दै पार्टीको प्रचारप्रसारमा लगाउदा पनि निर्वाचन आयोग मौन बस्नुले प्रश्न खडा हुन्छ ।
निर्वाचन आयोगले पार्टी प्रचारप्रसारमा बालबालिकाको प्रयोग गरिए उम्मेदवारलाई नै दण्डीत गर्ने प्रावधान बनाएपनि मात्र कागजमै सिमित रहेको बारे यी तस्बिरले प्रमाणित गरेको छ । निर्वाचन आयोगले बनाएको नीति निर्देशनलाई उम्मेदवारले लत्याउदै आफ्नो पार्टी प्रचारप्रसारमा बालबालिकाको प्रयोग गरिरहे पनि मौन बस्नुले निर्वाचन आयोगले बनाएको नीति निर्देशन माथि नै प्रश्न चिन्ह खडा भएको छ । यस बिषयमा निर्वाचन आयोगले समयमै ध्यान पुर्याउन जरुरी देखिन्छ ।
