चितवन २९ कार्तिक । मत्स्य व्यवसायी संघ चितवनले सोमबार दुई टन माछा नष्ट गरेको छ ।
भारतबाट अवैधरुपमा नेपाल भित्रिएको भन्दै आइतबार बिहान नियन्त्रणमा लिएको उक्त माछा सशस्त्र प्रहरी बल आँपटारी परिसरभित्र नष्ट गरिएको हो।
नेपाली बिलमा भारतीय माछा ल्याएको भन्दै चितवनका मत्स्य व्यवसायी गत असोज १ गतेदेखि आन्दोलनमा छन्। सोही क्रममा आइतबार बिहान पशु क्वारेन्टाइन कार्यालय रामनगरअगाडिबाट दुई टन (दुई हजार किलो) माछा नियन्त्रणमा लिइएको हो।
नवलपरासीको बर्दघाटबाट काठमाडौँ लैजाँदै गरेको अवस्थामा पङ्गासियस जातका माछा बोकेको लु ३ च ३३३६ नम्बरको गाडी नियन्त्रणमा लिएर अनुसन्धान गर्दा भारतीय माछा भएको पुष्टि भएपछि कानुनी प्रक्रियाअनुसार नष्ट गरिएको मत्स्य व्यवसायी संघ चितवनका उपाध्यक्ष अर्जुन लामिछानेले जानकारी दिए।
माछालाई नष्ट गरेपछि माछा बोक्नमा प्रयोग भएको सवारीसाधन र सवारी धनीलाई भने अवैध वस्तुको ढुवानी नगर्न सचेत गराउँदै छाडिएको छ। भारतबाट अवैधरुपमा आएका माछाले नेपाली बजार ओगट्दा नेपाली माछाले उचित मूल्यसहितको बजार नपाएको भन्दै चितवनका माछा किसान लामो समयदेखि सडकमा छन्। सोही क्रममा हालसम्ममा करिब चार हजार ६५० किलोभन्दा बढी अवैध माछा नष्ट गरिसकिएको छ।
