नवलपरासी, कात्तिक ३० । पश्चिम् निर्वाचन क्षेत्र नम्बर १ का उमेदवार एवम् नेपाली काङ्ग्रेसका केन्द्रिय सदस्य बिनोद चौधरी बर्दघाट नगरपालिका वडा नम्बर २ को सुखौरा पुगेका छन् । मतदाताका भावनालाई बुझ्न उनी ग्रामीण पहाडी क्षेत्र सुखौरा पुगेका हुन् ।
बर्दघाट नगरपालिका वडा नम्बर २ को सुखौरा सुगम भित्रको दुर्गम क्षेत्र जस्तै छ । बिकास निर्माणमा भौगोलिक रुपमा समेत दुर्गम उक्त क्षेत्रमा पुगेर उमेदवार चौधरीले त्यहाँको अवस्थालाई नजिकबाट नियालेका छन् । मगर समुदायको बाहुल्यता रहेको सुखौरा कृषी, पर्यटनको सम्भावना बोकेको क्षेत्र हो ।
सम्भावनाकाबीच कृषिको उर्वर भुमी र पर्यटनका हिसाबले उपयुक्त ठाउँ भएपनी त्यसको समुचित प्रयोग हुन नसकेको चौधरीले बताए । सडक संजालको समेत भरपर्दो पहुँच नहुँदा यहाँका नागरिक कठिन जीवन बिताउन बाध्य भएको चौधरीको भनाई थियो । सहज रुपमा राज्यको पहुँच नपुग्नु र नेतृत्वबाट समेत सुखौरालाई उपेक्षा गरिएको उनले बताए ।
सबै क्षेत्रमा विद्युतीकरण समेत नभएको सुखौरालाई सडक पुर्वाधारको स्तरोन्नति गरी होमस्टे सन्चालन गरी यहाँका मगर र अन्य समुदायको संस्कृतिको संरक्षण तथा पर्यटकिय गन्तब्य बनाउन सकिने उनले उल्लेख गरे । ‘यो क्षेत्र मलाई बत्ती मुनिको अँध्यारो महसुस भयो । अबको बिकास यी र यस्तै ग्रामिण भेगबाट सुरु गर्नु जरुरी छ’ उनले भने ।
सुखौराको सर्वोपरि बिकासका लागि आवश्यक सम्भावनाको खोजी गरी आर्थिक उपार्जनको बाटोमा डोर्याउन आफू प्रतिबद्ध रहेको उनको भनाई थियो ।यहाँको कृषिलाई आर्थिक बिकासमा जोडि स्थानिय उत्पादनको सहज बजारीकरणका लागि आफुले पहल गर्ने चौधरीले बताए ।
