नवलपरासी, मंसिर १ । हराएको बालक म सँग छ भनि सामाजिक संजाल मार्फत रकम माग्ने व्यक्ती कारागार चलान भएका छन् ।
गत असार १५ गते जिल्ला नवलपरासी (बर्दघाट- सुस्ता पूर्व) विनयी त्रिबेणी गा.पा. वडा नं. ७ शिवपुरगढीका २१ महिनाको बालक प्रज्वल थापा आफ्नै घरको आगनबाट हराएका थिए । प्रज्वलका अभिभावकले उनको खोजतलासका लागि सामाजिक संजाल फेसवुकमा हुलिया सहित फोटो, सम्पर्क नम्बर तथा ठेगाना पोष्ट गरिएको थियो ।
उक्त मोबाइल नम्बर, WHATSAPP र म्यासेन्जरमा बालक म सँग छ ५ लाख मेरो खातामा जम्मा गरिदिनुहोस बालक म देखाउछु भनि एक व्यक्तिले म्यासेज पठाउन थाले । उक्त म्यासेजको अनुसन्धान गर्दै जाँदा ती म्यासेज पठाउने व्यक्ती झापाको शिवसताक्षी गा.पा. वडा नं. ८ का २२ वर्षीय सन्दिप खड्का रहेको खुल्यो ।
सन्दिपबारे अनुसन्धान गर्दै जाँदा उनले दुवईबाट म्यासेज पठाएको पाइएको उनलाई इन्टरपोलको सहयोगमा दुवईबाट नेपाल झिकाईयो । निज सन्दिप खड्कालाई मुलुकी अपराध संहिता २०७४ को परिच्छेद २१ को ठगी अपराधिक विश्वासघात तथा अपराधिक लाभ सम्बन्धी कसुरमा अनुसन्धान गरि अभियोगपत्रसहित कात्तिक ३० गते नवलपुर जिल्ला अदालतमा पेश गरिएको थियो ।
सम्मानित नवलपुर जिल्ला अदालतले उनलाई पुर्पक्षको लागि कारागार भरतपुर चलान गर्ने आदेश दिइयो । हराएका बालक प्रज्वल थापा भने आफ्नै घर आँगन नजिक रहेको कुलोमा असार २४ गते मृत अवस्थामा फेला परेको थियो । उनलाई खेल्ने क्रममा नहरले बगाएको अनुसन्धानबाट खुलेको छ ।
