बारा, मंसिर २ । निर्वाचन आचारसंहिता विपरित स्थिर अवधीको समयमा नेकपा एकीकृत समाजवादीका उम्मेदवार किसान श्रेष्ठ र लोकतान्त्रिक समाजवादी पार्टीका उम्मेदवार जितेन्द्र सोनलले घरदैलो गरेका छन् । बारा क्षेत्र नं. ४ का प्रतिनिधिसभा सदस्य पदका उम्मेदवार श्रेष्ठ र प्रदेशसभा ४(२) का उम्मेदवार सोनलले स्थिर अवधिको उल्लंघन गर्दै शुक्रबार बिहान परवानीपुर गाँउपालिका – ३ लिपनीमालमा कार्यकर्तासहित घरदैलो गरेका हुन् ।
मंसिर ४ गतेको निर्वाचनका लागि बिहीबार राती १२ बजेदेखि नै स्थिर अवधि सुरु भएको हो । मतदान सम्पन्न नहुँदासम्म लागु हुने मौन अवधीको समयमा उम्मेदवार र दलले चुनावी प्रचारप्रसार गर्न पाउने छैनन् । तर निर्वाचन आयोगको निर्देशिका विपरीत श्रेष्ठ र सोनलले उक्त क्षेत्रमा घरदैलो गरिरहेका छन् । बाराका प्रहरी उपरीक्षक होबिन्द्र बोगटीले घरदैलो र चुनावी प्रचार भइरहेको सूचना प्राप्त भएपछि नियन्त्रण गर्न प्रहरी परिचालन गरिएको बताए ।
चुनावी प्रचार गरिरहेका उम्मेदवारलाई फोन गरेर उक्त कार्य तत्काल रोक्न आग्रह गरेको र नमानेमा आचारसंहिता बमोजिम कारवाही प्रक्रिया अघि बढाइने प्रहरी उपरीक्षक बोगटीले बताए । उनले निर्वाचन आचारसंहिता उल्लंघनका घटना निरीक्षण गर्ने र आचारसंहिता विपरितको कार्य गर्ने उम्मेदवारलाई कारवाही गर्ने निकायको अधिकृतलाई समेत परिचालन गरिएको जानकारी दिए ।
