काठमाडौ । प्रदेश तथा प्रतिनिधिसभाचुनावका लागि मतदान केन्द्रमा योपटक भिडभाड देखिएन । विगतका निर्वाचनमा बिहानैदेखि लामबद्ध भएर बस्ने गरेको भए पनि योपटक त्यस्तो पाइएन ।
पाँचथरमा दिउँसो २ बजेसम्म ३५ प्रतिशतमात्र मत खसेको थियो । ५० प्रतिशतको हारहारीमामात्र मतदान हुने देखिएको जिल्ला निर्वाचन कार्यालयको अनुमान रहेको छ । अनुमान गरेको भन्दा कम मतदान भएको जिल्ला निर्वाचन अधिकारी कुमार भट्टराईले बताए ।
विभिन्न मतदान केन्द्रमा हेर्दा मतदाताहरु उत्साहित भएको देखिँदैन थिए । स्थानीय तहको निर्वाचनमा ६५ प्रतिशत मतदान भएको थियो । चुनावी प्रचार प्रसारको क्रममा नदेखिएको चहलपहल मतदान केन्द्रसम्म पनि देखिएन । पाँचथरमा १ लाख ३८ हजार नौँ सय ३२ जना मतदाता रहेका छन् ।
फिदिम–४ को सुखबोध मावि मतदान केन्द्रमा विस्फोटबाहेक शान्तिपूर्ण रुपमा मतदान भइरहेको चुनावमा मतदाताको उत्साह देखिएन । दक्षिणी रविका मदन राईका अनुसार प्रचारप्रसारका क्रममा रौनक थिएन, अहिले मतदानस्थलमा पनि देखिएन । यस्तो भनाइ विभिन्न क्षेत्रका बासिन्दाको रहेको छ ।
