काठमाडौं, मंसिर ५ । मुस्ताङबाट प्रतिनिधि सभा सदस्यमा नेपाली कांग्रेसका उम्मेदवार २९ वर्षका योगेश गौचन थकाली निर्वाचित भएका छन् । योगेश ३९९६ मतसहित निर्वाचित भएका हुन्।
उनका प्रतिद्वन्द्वी नेकपा एमालेका उम्मेदवार निवर्तमान सांसद प्रेमप्रसाद तुलाचनले ३ हजार ७८ मत ल्याएका छन् । कांग्रेसले यहाँ जिल्ला सभापति रोमी गौचन थकालीलाई टिकट दिएको थियो । तर रोमीले आफूलाई पाएको टिकट छोरा योगेशलाई दिएका थिए ।
मुस्ताङबाट जितेका योगेश थासाङ गाउँपालिका लेतेका बासिन्दा हुन् । उनले बिजनेस म्यानेजमेन्टमा स्नातक गरेका छन् । उनी पर्यटन व्यवसायी र होटल व्यवसायी पनि हुन् । नेविसंघको राजनीतिबाट योगेश पार्टी राजनीतिमा आएका थिए । उनी कांग्रेसमा महाधिवेशन प्रतिनिधि पनि छन् ।
मुस्ताङको कूल जनसंख्या ११ हजार ५९३ रहेको छ । यस जिल्लामा कूल मतदाता १० हजार ९५७ रहेका छन् । यहाँ ७ हजार २३० मत खसेको थियो ।
