चितवन, मंसिर ६ । चितवनका सञ्चारकर्मी महाविर विश्वकर्माको सवारी दुर्घटनामा परी मृत्यु भएको छ । राप्ती नगरपालिका–४ सुन्दरबस्तीस्थित आफ्नो घरबाट काठमाडौं जाँदै गर्दा राप्ती नगरपालिका–६ हर्दीमा आज बिहान साढे ५ बजे माइक्रो बस दुर्घटना हुँदा उनको मृत्यु भएको हो ।
उनी सवार बा ४ ख ४१२ नम्वरको माइक्रोबस बिग्रेर रोकिराखेको ना २ ख ८५२२ नम्वरको ट्रकमा ठोक्किएको थियो । बसले च्यापिएका विश्वकर्मालाई झण्डै २ घण्टापछि निकालिएको थियो । उनको घटनास्थलमै मृत्यु भएको प्रहरीले जनाएको छ । उक्त दुर्घटनामा अन्य पाँच जना घाइते भएका छन् ।
विश्वकर्माको शव पोष्टमाटमका लागि भरतपुर अस्पताल ल्याइदै छ । उनी लामो समयदेखि चितवनको रेडियो चितवन र कालिका एफएममा कार्यरत थिए । उनले सञ्चालन गरिरहेको कार्यक्रम बहकिने मन देशभर चर्चित छ । देशका एक सय बढि एफएम रेडियोमा उनको कार्यक्रम प्रशारण हुने गर्छ ।
उनी पत्रकार महासंघ चितवनको पूर्व सदस्य र प्रेस चौतारी चितवनको पूर्व कार्यसमिति सदस्यसमेत थिए । राष्ट्रिय दलित पत्रकार संघ चितवनका अध्यक्ष अमिर रामदामले घटनाप्रति दुःख व्यक्त गर्दै शोक वक्तव्य जारी गरेका छन् ।
