परासी । अन्तर्राष्ट्रिय कुस्ती प्रतियोगितामा रामग्राम नगरपालिका -९ जोकवार (नवलपरासीका) बसन्त थापाले हात पारेको छ । लुम्बिनी राष्ट्रिय महोत्सवका अवसरमा भैरहवामा आयोजित अन्तर्राष्ट्रिय कुस्ती प्रतियोगिताको उपाधि पश्चिम नवलपरासीका बसन्त थापाले प्रथम पुरस्कार हात पारेका हुन् ।
बुधबार भएको फाइनल खेलमा भारतको पंजावका कालिचिता पहलवानलाई पराजित गर्दै बसन्त थापा पहिलो भएका हुन् । कालिचिताले दोस्रो स्थानमा चित्त बुझाए । पहिलो स्थान हासिल गर्न सफल बसन्त थापाले २५ हजार रुपैयाँ प्राप्त गरे भने दोस्रो भएका कालिचिताले १५ हजार रुपैयाँ प्राप्त गरे ।
यस्तै, पंजावकै अशोक पहलवान तेस्रो भए । विरगंजका बाबा पहलवानले प्रतिस्पर्धा नगरेपछि अशोक तेस्रो भएका हुन् । उनले नगद ११ हजार रुपैयाँ प्राप्त गरे ।
विजेता खेलाडीहरुलाई महोत्सव एवं कुस्ती प्रतियोगिता आयोजक संस्था सिद्धार्थ उद्योग बाणिज्य संघका अध्यक्ष भीष्मप्रसाद न्यौपाने, संघका बरिष्ठ उपाध्यक्ष ठाकुरकुमार श्रेष्ठ, कोषाध्यक्ष गोविन्द ज्ञवाली, खेल संयोजक हरिबहादुर थापा, प्रचारप्रसार संयोजक कृष्णप्रसाद घिमिरे, सिद्धार्थनगर नगरपालिकाका प्रशासन प्रमुख शेखरनाथ पन्थी लगायतले नगद, ट्रफी र मेडल प्रदान गरेका थिए ।
मंसिर २३ बाट सुरु महोत्सवमा २६ देखि २८ गतेसम्म तीन दिन अन्तर्राष्ट्रिय कुस्ती प्रतियोगिता भएको थियो ।कुस्तीको लोकप्रियतालाई कायम राख्दै महोत्सवमा अधिक दर्शक भित्र्याउन र खेल संस्कृतिको विकास गर्न भन्दै अन्तर्राष्ट्रिय प्रतियोगिता आयोजना गरिएको थियो ।
कुस्तीमा नेपालका ८ र भारतका पुरुष तथा महिला गरी १४ जना पहलवानहरुले प्रतिस्पर्धा गरेका थिए । कुस्ती हेर्न गाउँगाउँबाट दर्शकहरुको महोत्सव स्थलमा घुइँचो लागेको थियो ।
रामग्राम नगरपालिकाको सान बढाउदै आईरहेका वसन्त थापालाई रामग्रामका जोकवारका सम्पुर्ण युवाहरुको तर्फबाट बसन्त थापालाई धन्यवाद तथा शुभकामना दिदै हाम्रो नेपालको सान भनेर सम्बोधन गरेका छन
